PILA KA MGA IRRIGATOR'S ASSOCIATIONS, NAGBULIG SA BRIGADA ESKWELA

Pila ka mga Irrigator’s Associations (IA) sa idalom sang National Irrigation Administration-Iloilo-Guimaras Irrigation Management Office (NIA-IGIMO) nagpakita sang ila suporta sa ila tagsa-tagsa ka komunidad paagi sa pagpartisipar sa 2024 Brigada Eskwela sa probinsya sang Iloilo kag Guimaras. Ini nga mga mangunguma, nagpakita sang ila pag-ulikid sa komunidad pinaagi sa aktibo nga pagtambong kag pag partisipar sa mga aktibidad sa pagpanglimpyo sa eskwelahan. Pinaagi sa pagpaninlo sang mga bulothu-an kag palibot, upod sa mga maestra, ginikanan, kag estudyante, sila nagpreparar sang eskwelahan para sa bag-o nga tuig.

Magluwas sa pagpanglimpyo, nagpakita man sila sang ila pagkamabinuligon pinaagi sa pag pa ambit sang mga school supplies sa mga estudyante. Ang ila bulig nagdala sang mga pagyuhom sa mga nawong sang mga estudyante kag mga ginikanan.

Ini nga inisyatibo nagapahayag sang makusog nga pakigpartner sa komunidad, kag nagapahayag sang dedikasyon sang mga mangunguma, indi lamang sa pagtrabaho sa uma para sa agrikultura kundi sa pag-amot man sa pag-uswag sang mga kabataan kag sang komunidad.

Ang NIA Region VI sa pagpanguna ni Engr. Jonel B. Borres, Acting Regional Manager kag Engr. Randy C. Alipis, Division Manager A sang IGIMO, nagapanginbulahan guid sa aton mga mapisan nga mga mangunguma.